ప్లాస్టిక్ రహిత సమాజమే లక్ష్యం: పోలీసుల ‘శ్రమదానం’

​అనకాపల్లి రాష్ట్ర ప్రభుత్వం ప్రతిష్టాత్మకంగా చేపట్టిన "స్వర్ణాంధ్ర స్వచ్ఛ ఆంధ్ర కార్యక్రమంలో భాగంగా, ఫిబ్రవరి నెల థీమ్ "ప్లాస్టిక్ కాలుష్య నివారణ మరియు అవగాహన" పై అనకాపల్లి జిల్లా పోలీస్ శాఖ ప్రత్యేక దృష్టి సారించింది. జిల్లా ఎస్పీ తుహిన్ సిన్హా, ఆదేశాల మేరకు, జిల్లా పోలీస్ కార్యాలయంలో శనివారం శ్రమదానం నిర్వహించారు.అదనపు ఎస్పీలు ఎం.దేవ ప్రసాద్ మరియు ఎల్.మోహనరావు నేతృత్వంలో జరిగిన ఈ కార్యక్రమంలో పోలీసు అధికారులు, సిబ్బంది స్వచ్ఛందంగా పాల్గొని కార్యాలయ ప్రాంగణాన్ని శుభ్రపరిచారు.కార్యాలయ గదులు, రికార్డు రూమ్‌లు మరియు పార్కింగ్ ప్రదేశాల్లో పేరుకుపోయిన ప్లాస్టిక్ వ్యర్థాలను ఏరివేసి, పర్యావరణ హితంగా నిర్మూలించారు.చెత్తను వేరు చేసేందుకు ప్రత్యేక డస్ట్‌బిన్‌లను ఏర్పాటు చేశారు. భవిష్యత్తులో కార్యాలయం ప్లాస్టిక్ రహితంగా ఉండేలా ‘జీరో వేస్ట్ మేనేజ్‌మెంట్’ చర్యలు చేపట్టారు.కార్యాలయ పనితీరు మెరుగుపడాలన్నా, సిబ్బంది ఆరోగ్యంగా ఉండాలన్నా పరిశుభ్రత ఎంతో కీలకమని ఈ సందర్భంగా అధికారులు నొక్కి చెప్పారు.ప్లాస్టిక్ వాడకాన్ని తగ్గించడంతో పాటు, పర్యావరణ సమతుల్యత కోసం కార్యాలయ ఆవరణలో మొక్కలు నాటారు.ఈ సందర్భంగా అదనపు ఎస్పీలు మాట్లాడుతూ "ప్లాస్టిక్ అనేది భూమికి, మానవ ఆరోగ్యానికి పెను ముప్పు. ఈ నెల థీమ్ ప్రకారం, ప్రతి పోలీస్ స్టేషన్ మరియు కార్యాలయం ప్లాస్టిక్ రహితంగా మారాలి. ప్రజలకు రక్షణ కల్పించడమే కాకుండా, పర్యావరణ పరిరక్షణలో కూడా పోలీస్ శాఖ ఆదర్శంగా నిలవాలి" అని పిలుపునిచ్చారు.ఈ కార్యక్రమంలో స్పెషల్ బ్రాంచ్ డీఎస్పీ జీ.ఆర్.ఆర్.మోహన్, ఇన్స్పెక్టర్లు లక్ష్మణమూర్తి, బాల సూర్యారావు, లక్ష్మి, ఎస్సైలు ప్రసాద్, సురేష్ బాబు, సత్యనారాయణ మరియు కార్యాలయ సిబ్బంది పెద్ద సంఖ్యలో పాల్గొన్నారు.