ఏపీ బీజేపీ బలోపేతంపై కీలక చర్చలు....రాష్ట్ర ఇన్‌చార్జి అరవింద్ సింగ్ భదోరియాకు విజయవాడలో ఘన స్వాగతం

స్థానిక సంస్థల ఎన్నికలకు పార్టీ శ్రేణులను సన్నద్ధం చేయడంపై దృష్టి
విజయవాడ: బీజేపీ ఆంధ్రప్రదేశ్ రాష్ట్ర ఇన్‌చార్జిగా బాధ్యతలు చేపట్టిన అరవింద్ సింగ్ భదోరియా తొలిసారిగా రాష్ట్రానికి విచ్చేసిన సందర్భంగా విజయవాడ విమానాశ్రయంలో పార్టీ నాయకులు, కార్యకర్తలు ఘన స్వాగతం పలికారు.బీజేపీ రాష్ట్ర అధ్యక్షుడు పీవీఎన్ మాధవ్, మంత్రి సత్యకుమార్ యాదవ్‌తో పాటు పలువురు ప్రజాప్రతినిధులు, రాష్ట్ర నాయకులు, కార్యకర్తలు భదోరియాకు స్వాగతం పలికారు.అనంతరం జరిగిన బీజేపీ రాష్ట్ర పదాధికారుల సమావేశంలో అరవింద్ సింగ్ భదోరియా పాల్గొన్నారు. రాష్ట్రంలో పార్టీని సంస్థాగతంగా మరింత బలోపేతం చేయడం, క్షేత్రస్థాయిలో పార్టీ కార్యక్రమాలను విస్తరించడం, కూటమి పార్టీలతో సమన్వయం కొనసాగించడం వంటి అంశాలపై సుదీర్ఘంగా చర్చించారు.రానున్న స్థానిక సంస్థల ఎన్నికల నేపథ్యంలో పార్టీ శ్రేణులను పూర్తిస్థాయిలో సన్నద్ధం చేయడం, బూత్ స్థాయి నుంచి పార్టీ నిర్మాణాన్ని మరింత పటిష్ఠం చేయడం, కేంద్ర ప్రభుత్వ అభివృద్ధి, సంక్షేమ కార్యక్రమాలను ప్రజల్లోకి విస్తృతంగా తీసుకెళ్లడంపై సమావేశంలో ప్రధానంగా దృష్టి సారించారు.స్థానిక సంస్థల ఎన్నికల్లో అనుసరించాల్సిన వ్యూహాలు, కూటమి పార్టీలతో సమన్వయం, క్షేత్రస్థాయిలో పార్టీ బలోపేతానికి చేపట్టాల్సిన కార్యక్రమాలపై నాయకులు చర్చించారు.