ఏపీ బీజేపీ బలోపేతంపై కీలక చర్చలు
🗞️ బిబి న్యూస్ | 02 Oct 2026
రాష్ట్ర ఇన్చార్జి అరవింద్ సింగ్ భదోరియాకు విజయవాడలో ఘన స్వాగతం...
స్థానిక సంస్థల ఎన్నికలకు శ్రేణులను సిద్ధం చేయాలని పిలుపు..
బూత్ స్థాయి నుంచి పార్టీ బలోపేతంపై ప్రధాన దృష్టి
విజయవాడ, అక్టోబర్ 1: రానున్న స్థానిక సంస్థల ఎన్నికలను దృష్టిలో ఉంచుకుని భారతీయ జనతా పార్టీ ఆంధ్రప్రదేశ్లో సంస్థాగత బలోపేతంపై దృష్టి సారించింది. ఏపీ బీజేపీ రాష్ట్ర ఇన్చార్జిగా బాధ్యతలు చేపట్టిన డాక్టర్ అరవింద్ సింగ్ భదోరియా తొలిసారిగా రాష్ట్రానికి వచ్చిన సందర్భంగా విజయవాడ విమానాశ్రయంలో పార్టీ నాయకులు, కార్యకర్తలు ఘన స్వాగతం పలికారు. రాష్ట్ర అధ్యక్షుడు పీవీఎన్ మాధవ్, మంత్రి సత్యకుమార్ యాదవ్తో పాటు పలువురు ప్రజాప్రతినిధులు, రాష్ట్ర నాయకులు స్వాగత కార్యక్రమంలో పాల్గొన్నారు.అనంతరం విజయవాడలో రాష్ట్ర అధ్యక్షుడు పీవీఎన్ మాధవ్ అధ్యక్షతన జరిగిన బీజేపీ రాష్ట్ర పదాధికారుల సమావేశంలో రాష్ట్ర ఇన్చార్జి అరవింద్ సింగ్ భదోరియా, సహ ఇన్చార్జి వనతి శ్రీనివాసన్ పాల్గొన్నారు. పార్టీ సంస్థాగత వ్యవహారాలు, క్షేత్రస్థాయిలో పార్టీ విస్తరణ, రానున్న స్థానిక సంస్థల ఎన్నికలకు సన్నద్ధత తదితర అంశాలపై సమావేశంలో విస్తృతంగా చర్చించారు.కార్పొరేషన్, మున్సిపల్, పంచాయతీ, జడ్పీటీసీ, ఎంపీటీసీ ఎన్నికలను దృష్టిలో ఉంచుకుని బూత్ స్థాయి నుంచి పార్టీ నిర్మాణాన్ని మరింత బలోపేతం చేయాలని నేతలు సూచించారు. రాష్ట్ర, జిల్లా స్థాయి పదాధికారులు నిరంతరం క్షేత్రస్థాయిలో పర్యటిస్తూ కార్యకర్తలతో సంబంధాలు కొనసాగించాలని భదోరియా సూచించారు. పాత కార్యకర్తలను తిరిగి కలుపుకొని పార్టీ సిద్ధాంతాలు, కార్యక్రమాలను ప్రజల్లోకి మరింత విస్తృతంగా తీసుకెళ్లాలని పేర్కొన్నారు.స్థానిక సంస్థల ఎన్నికలకు పార్టీ పూర్తిస్థాయిలో సిద్ధం కావాలని పీవీఎన్ మాధవ్ సూచించారు. పార్టీకి సంస్థాగతంగా బలం ఉన్న ప్రాంతాలను గుర్తించి, కూటమి పార్టీలతో సమన్వయంతో ముందుకు వెళ్లే అంశంపై దృష్టి పెట్టనున్నట్లు తెలిపారు. స్థానిక ఎన్నికల సన్నద్ధత కోసం మంత్రి సత్యకుమార్ యాదవ్ నేతృత్వంలో కమిటీ ఏర్పాటు చేసినట్లు సమావేశంలో వెల్లడించారు.కేంద్ర ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజల్లోకి విస్తృతంగా తీసుకెళ్లడంతో పాటు క్షేత్రస్థాయిలో ప్రజలతో మమేకం కావాలని నాయకులకు సూచించారు. కూటమి ధర్మాన్ని పాటిస్తూ టీడీపీ, జనసేనతో సమన్వయం కొనసాగించడంతోపాటు బీజేపీ సంస్థాగత గుర్తింపును మరింత బలోపేతం చేయాలని సమావేశంలో చర్చించారు.ఈ సందర్భంగా అనకాపల్లి జిల్లా బీజేపీ అధ్యక్షుడు ద్వారపురెడ్డి పరమేశ్వరరావు, ఏపీ బీజేపీ రాష్ట్ర ఇన్చార్జిగా బాధ్యతలు స్వీకరించిన డాక్టర్ అరవింద్ సింగ్ భదోరియాను శాలువాతో సత్కరించి అభినందనలు తెలిపారు.రానున్న స్థానిక సంస్థల ఎన్నికలకు పార్టీ శ్రేణులను సన్నద్ధం చేయడం, బూత్ స్థాయి నుంచి సంస్థాగత నిర్మాణాన్ని పటిష్ఠం చేయడం, కూటమి పార్టీలతో సమన్వయంతో ముందుకు సాగడం వంటి అంశాలు ఈ సమావేశంలో ప్రధానంగా చర్చకు వచ్చాయి.